गोरखा — दसैंको पहिलो दिन आइतबार गोरखा दरबार क्षेत्रमा तीन पाथी जौको जमरा राखिएको छ । ११:२९ को उत्तम साइतमा गोरखा कालिका मन्दिरको दसैंघर र गोरखनाथ मन्दिरमा ११/११ माना, उपल्लो कोट र तल्लो कोटमा १/१ माना जौको जमरा राखिएको गोरखा दरबारका मूल पुजारी शारदाप्रसाद भट्टराईले बताएका छन् ।
नवरात्रको पहिलो दिन आइतबार बिहान सवा ५ बजे भगवतिलाई कैलाश कोठाबाट गर्भगृह (दसैंघर) मा ल्याइएको थियो ।
झिसमिसे उज्यालोमै भगवती सार्ने प्रचलन छ । नवरात्र भर गोरखा दरबारमा विशेष पूजा हुनेगर्छ । ‘आज पहिलो दिन नवदुर्गाको नौ रुपमध्ये शैलपुत्रीको पूजा आरधना गर्यौँ,’ उनले भने । गोरखा दरबारमा जमरा राख्नका लागि उपल्लो कोटबाट माटो ल्याएर दसैंघर लिपपोत गरिएको थियो । ‘पूजाका बेला बज्ने मालश्री धुन पनि यो बेला परिवर्तन हुन्छ, काया अष्टमीमा मालश्री गाउने, हेराएर जमारा राख्ने प्रयोजनका लागि उपल्लो कोटबाट माटो ल्याएर दसैंघर लिपपोत गरेका थियौं,’ उनले भने ।
नवरात्र अवधीभर गोरखा दरबारमा १६ राँगा, ३६ बोका, १० भेडा ८ कुखुरा, ५ सुँगुर गरी ७५ वटा सरकारी बली चढ्ने पनि भट्टराईले जानकारी दिए । २०७२ वैशाख १२ को भूकम्पले क्षति पुर्याएको गोरखा दरबार र गोरखा कालिका मन्दिर पुनर्निर्माण सकिएकाले विगतका वर्ष जस्तो पुजामा भक्तजनलाई असहजता नरहेको पनि उनले बताए ।
‘विगतको वर्ष ठाउँ व्यवस्थापन गाह्रो थियो, कालिका मन्दिर मर्मतको क्रममा गोरखा दरबारको एउटा कोठाबाट पूजाको व्यवस्थापन मिलाएका थियौं, कालिका मन्दिरको मर्मत सकिएपछि गत असार १८ गते वास्तु र क्षमा पुजा गरेर साविककै ठाउँबाट पुजा शुरु भइसकेको छ,’ उनले भने, ‘विगतमा जस्तो असहजता छैन, भक्तजनले पनि सजिलोका साथ पूजा गर्न सक्नुहुन्छ ।’
कान्तिपुर